Hefur ástand fjallvega þessi áhrif?

Ég fór upp í Kerlingafjöll fyrir rúmri viku. Þar sá ég hversur hrikalega slæmt ástand Kjalvegar er eða í það minnsta þess hluta hans sem þarf að fara til að komast í Kerlingafjöll. Árið 2010 fór ég upp að Hvítárvatni og þá var ástand þess hluta Kjalvegar sem þarf að fara til að komast þangað mun betra en það er í dag.

Það hefur verið svolítið fjallað um það hversu mikið ástand þjóðvegakerfisins hefur versnað vegna niðurskurðar til viðhaldsframkvæmda. Væntanlega hafa fjallvegir ekki farið varhluta af þeim niðurskurði þannig að ég geri ráð fyrir að slæmt ástand Kjalvegar sé ekki einsdæmi heldur eigi þetta almenn við um fjallvegi rétt eins og aðra þjóðvegi.

Er ekki mögulegt að þessi samdráttur sem orðið hefur í umferð um fjallvegi eigi sér skýringu í versnandi ástandi þeirra þó vissulega megi reikna með að hækkað verð á eldsneyti eigi sinn þátt í þessum samdrætti.

Aftur dregur úr umferð um Kjalveg

Athugasemdir

[Serafina (IP-tala skráð) 21.8.2012 kl. 16:40]

Það er löngu kominn tími á að farið verði að taka afstöðu til vegarlagningar þvert yfir hálendið til að stytta leiðina milli tveggja helstu Nú þegar áformin um Vaðlaheiðargöng eru að verða að veruleika sýnist manni einboðið, að vegurinn um Sprengisand verði fyrir valinu sem aðalleið, hann verði byggður eðlilega upp og malbikaður með 8 m slitlagi. Þegar er búið að leggja ágætan veg vegna virkjana stóran hluta leiðarinnar að sunnanverðu. Auðvitað koma dagar þegar vegurinn verður ófær vegna snjóa, en það verður hin leiðin um Húnavatnssýslurnar líka. Þar eru afskaplega leiðinlegir kaflar, sem iðulega verða ófærir þótt hvergi sé ófærð annarsstaðar. Má þar nefna sem dæmi Holtavöruheiðina, Línakradalinn, utanverðan Langadal, Vatnsskarð og svo Öxnadalsheiði. Óvíst er hvort Sprengisandsleiðin yrði nokkuð þyngri hvað snjómokstur varðar, því þar er líka hægt að velja vegarstæðið meira með tilliti til snjóalaga og ekki þarf að taka í sama mæli tillit til mannvirkja, ræktunar o.s.frv. Í skipulagi miðhálendisins, sem nú hefur nýverið verið endurskoðað, er m.a. gert ráð fyrir því að á þessu svæði verði "mannvirkjabraut", þ.e. gert ráð fyrir orkulögnum og vegi. Styttingin milli Reykjavíkur og Akureyrar yrði mikil og leiðin öll miklu skemmtilegri.