Hrikalega illa skrifuð frétt.

Það er með ólíkindum að starfandi blaðamaður skuli hafa skrifað þessa frétt. Eru ekki gerðar neinar kröfur til blaðamanna hjá Mbl.is

 

Í fyrsta lagi kemur það ekki fram fyrr en í næst síðustu setningu með hvaða liði þessi maður spilar eða öllu heldur fyrir hvaða lið hann ætti að vera að spila fyrir ef hann væri í leikhæfu ástandi. Ég hefði talið eðlilegt að það væri meðal fyrstu upplýsinga í fréttinni.

 

Í öðru lagi er sagt frá því að maður að nafni Dr. Richard Steadman hafi tilkynn forráðamönnum liðs hans um að hann gæti ekki spilað meira með á leiktíðinni án þess að það sé tekið fram hver tengsl þess manns séu við knattspyrnumanninn. Vissulega er það eðlileg ágiskun að hann sé læknir, sem hafi eitthvað með leikmannin að gera en hvort það sé bandaríski læknirinn, sem hefur haft hann til meðhöndlunar, trúnarðarlæknir liðsins eða læknir með einhver önnur tengsl við leikmannin kemur hvergi fram.

 

Svo er talað um að þessi læknir, sem hvergi kemur fram hvaða stöðu gegnir, hafi tilkynnt "forráðamönnum Lundúnarliðsins" um þetta án þess að enn hafi komið fram í fréttinni um hvaða Lundúnarlið sé að ræða.

 

Er ég einn um að telja þetta lélega framsetningu á frétt?

Johnson ekki meira með á tímabilinu

Athugasemdir

[Jón Andrésson (IP-tala skráð) 5.2.2010 kl. 21:21]

Það kemur fram í byrjun að Fulham hafi tilkynnt um meiðslin svo að mér finnst ekkert rangt við þetta

[Hilmar Dúi Björgvinsson, 6.2.2010 kl. 10:31]

mikið er ég sammála þér. þessi fréttaflutningur er til skammar eins og bara allur fréttaflutningur um minni liðin í Englandi. Það er eins og að menn þurfi ekkert að kynna sér málin áður en það er skrifað um þau.

[Sigurður M Grétarsson, 6.2.2010 kl. 12:51]

Annað hvort hef ég verið svona staurblindur þegar ég las fréttina eða fyrstu setningunni hefur verið breytt eftir að ég las hana. Gefum okkur þó að ég hafi hreinlega ekki tekið eftir þessu.

Það breytir þó ekki því að þetta er illa skrifuð frétt gagnvart lesendum eins og mér, sem eru ekki mikið inni í  knattspyrnu erlendra félagsliða en fylgjast þó aðeins með. Það kemur til dæmis hvergi fram í fyrstu setningunni hvaða fyrirbæri þetta "Fulham" er. Er þetta nafn á knattspyrnuliði eða manni. Til dæmis umboðsmanni knattspyrnumannsins eða einhverjum forráðamanni þess liðs, sem hann spilar með eða bara nafnið á pabba hans.

Það væri því strax skárra ef í upphafi hafi verð sagt "Knattspyrnuliðið Fullham hefur tilkynnt o.s.frv. Þá færi það ekki milli mála að þetta "Fullham" er nafnið á knattspyrnuliðinu, sem umræddur leikmaður leikur með. Reyndar hefði ég viljað bæta við upplýsingum um hvers lenskt þetta knattspyrnulið væri þannig að í upphafi hgefði verið sagt "Enska knattspyrnuliðið Fullham hefur tilkynnt". Ég hafði ekki hugmynd um það þegar ég las greinina í hvaða landi þessi knattspyrnumaður er að spila fyrr en talað var um "Lundúnarliðið" í seinni málsgrein fréttarinnar.

Reyndar er það ekki svo að knattspyrnuliðið gefi út þessa yfirlýsingu. Það er einhver að forráðamönnum liðsins eða blaðafulltrúi þess. Það væri eðlilegt að það kæmi fram hver það er, sem gaf út þessa yfirlýsingu. Reyndar er möguleiki á að þessi yfirlýsing hafi komið fram nafnlaust á heimasíðu félagsins en þá er eðlilegt að geta þess þegar fjallað er um það í fjölmiðli.

Því hefði að mínu mati fagleg framsetning á fyrstu setningunni verð einhvern vegin svona:

Að sögn X blaðafulltrúa/knattspyrnustjóra/framkvæmdarstjóra enska knattspyrnuliðsins Fullham o.s.frv.

Eða

Fram kemur á heimasíðu enska knattspyrnufélagsins Fullham o.s.frv.

Annað, sem ég tel að mætti alveg að ósekju koma fram í fréttinni er í hvaða deild Fullham leikur. Það gefur ákveðna innsýn í það hversu stórt þetta mál er í enskri knattspyrnu. Ég vissi það ekki fyrir lestur þessarar fréttar og veit ekki enn.

Þetta er allt fyrir utan það að það vantar alveg í fréttina hver þessi Dr. Richard Steadman er, sem tilkynnti forráðamönnum félagsins að meiðsli knattspyrnumannsins væru það alvarleg að hann kæmi ekki meira við sögu á þessari lektíð.

[Ómar Ragnarsson, 6.2.2010 kl. 13:07]

Víða má sjá þess merki að í örvæntingarfullri viðleitni eigenda fjölmiðla til að spara hafi þeir sagt upp reynsluboltum og ráðið í staðinn fólk, sem hefur takmarkað vald á íslensku máli og rökhugsun, sem nauðsynleg er í blaðamennsku.

Ég hef bloggað um ýmis dæmi um þetta og meðal annars um frétt af árekstri lögreglubíls sem var aldeilis framúrskarandi eða eigum við að segja afturúrskarandi illa skrifuð.

Á bloggsíðu minni er hægt í sérstökum glugga vinstra megin hægt að leita að henni með því að nota leitarorð.

[ingi (IP-tala skráð) 6.2.2010 kl. 16:10]

Jesús Krístur hvað fól getur vælt endalaust yfir engu á þessu blessaða mobbabloggi. Spurning hvort að þið sem að vælið svona ættuð ekki að færa ykkur frekar yfir á barnaland.is ?