Ómerkilegur blekkingaleikur Bændasamtakanna

Bændasamtökin vita það vel að þær breytingar, sem nú stendur til að gera á stjórnkerfi landbúnaðarins til aðlögunar að ESB reglum er vegna EES samningsins en ekki vegna ESB umsóknar Íslands. Það féll úrskurður um það fyrir nokkrum mánuðum að stjórnkerfi landbúnaðarins hér á landi stæðist ekki EES samningin og það er þess vegna, sem verið er að breyta því. Það er útilokað að þetta hafi farið framhjá forstöðumönnum Bændasamtakanna. Samt slá þeir þessu upp með þessum hætti til að blekkja fólk og fá það til að halda að einhver aðlögun sé í gangi vegna ESB umsóknar okkar.

 

Staðreyndin er sú að við þurfum að gera þessa breytingu á stjórnkerfi landbúnaðarins þó við drögum ESB umsókn okkar til baka enda þörfin fyrir þessa breytingu óháð ESB umsókninni. Þau 16 ár, sem við höfum verið aðilar að EES samningnum höfum við þurft að framkvæma margar lagabreytingar á hverju ári til samræmis og við ESB reglur vegna hans og það án þess að hafa nokkuð um það að segja. Þessi breyting á stjórnkerfi landbúnaðarins er aðeins ein slík breyting og það mun þurfa að framkvæma margar slíkar breytingar allan þann tíma, sem við stöndum í samningaviðræðum við ESB og við munum þurfa að gera það áfram þó við höfnum ESB aðild ef við ætlum að vera áfaram aðilar að EES samnignum.

 

Önnur vinna, sem er í gangi varðandi stjórnkerfi landsins vegna ESB umsóknar okkar felst ekki í að framkvæma neinar breytingar heldur að greina það hverju þarf að breyta. Í því felst að gera þarfagreiningar á öllu okkar stjórnkerfi til að sjá hvaða stofnanir við þurfum að stofna og hverjum við þurfum að breyta, hvaða tölvukerfi við þurfum að nota við þær breytingar, hversu marga starfsmenn nýjar einingar þurfa og hvað þetta allt kostar. Síðan þarf að gera dagsetta aðgerðaráætlun um það hvenær og hvernig á að standa að þeim breytingum ef svo fer að aðild Íslands að ESB verði samþykkt í þjóðaratkvæðagreiðslu. Engin krafa er á okkur um að framkvæma neitt af þessu ef aðild að ESB verður felld í þjóðaratkvæðagreiðslu og þaðan af síður að eitthvað þurfi að framkvæma áður en tekin hefur verið ákvörðun um aðild.

 

Þarna eru Bændasamtökin því að ástunda blekkingarleik til að sannfæra almenning um að sú mýta, sem ESB andstæðingar hafa verið að halda fram sé sönn. Upphrópun eins og þessi veldur athygli en svar síðar með leiðréttingum vekur ekki eins mikla athygli. Þeim mun lengri tími, sem líður frá því upphrópun á við þessa er sett fram þangað til leiðrétting kemur fram þeim mun minni athygli fær leiðréttingin og þeim mun fleiri taka hina röngu upphrópun, sem gefinni staðreynd.

 

Það er því varla tilviljun að þessi fyrirspurn Bændasamtakanna til Össurar skuli koma fram þegar hann er nýfarinn til Bandaríkjanna í embættiserindum því sú tímasetning hámarkar þann tíma, sem líður þangað til hann nær að koma fram með leiðréttingu. Einnig er Alþingi upptekið núna vegna þingmannafrumvarpsins og hugsanlegra ákæra á ráðherra fyrir Landsdómi þannig að varla hefur utanríkismálanefnd tíma til að ræða þetta á næstunni.

 

Þarna eru Bændasamtökin því að viðhafa ómerkilegan blekkingarleik. Það má því ljóst vera að þar á bæ á að tjalda öllu til í viðleitni til að koma í veg fyrir ESB aðild Íslands og engin aðferð í því efni virðist vera of óheiðarleg eða ómerkileg í þeirri vegferð.

Vilja að staða landbúnaðar í ESB-samningaferli verði skýrð

Athugasemdir

[Baldur (IP-tala skráð) 22.9.2010 kl. 19:51]

Sæll Sigurður, lestu afstöðu ESB annars vegar og viðtalið við Össur á Pressunni hins vegar. Þá rennur upp fyrir þér hver er að stunda ómerkilegan blekkingarleik.

 http://www.utanrikisraduneyti.is/media/esb/27072010-ESB-statement-isl.pdf 

http://www.pressan.is/Frettir/Lesafrett/ossur-hundskammar-jon-bjarnason-talar-toma-vitleysu-og-tharf-ad-lesa-ser-betur-til 

"Ef að það reynist nauðsynlegt að breyta lögum eða jafnvel einhverjum stofnanastrúktúr, þá er það ekki gert fyrr en eftir að þjóðin hefur samþykkt aðild í þjóðaratkvæðagreiðslu". Þetta er því miður bara bull í Össuri.

[Þorsteinn H. Gunnarsson, 22.9.2010 kl. 20:09]

Bændur vilja þjóð sinni vel.

Hvar værum við staddir ef við ættum ekki bændastétt?

Við ættu enga sögu eða menningu. Ekkert.

Við værum varla til.

Og nú er bissnesinn búinn að hafa æruna af þjóðinni.

Hvar er hamingjan af EES samningnum? Ég bara spyr?

[Guðmundur Jónas Kristjánsson, 22.9.2010 kl. 20:16]

Sigurður minn. Ekki reyna svona BULL. Skv. EES-samningnum er LANDBÚNAÐUR og SJÁSVARÚTVEGUR  UTAN þess samnings. Þannig,
HÆTTU ÞESSU BULLI!

[Sigurður Haraldsson, 22.9.2010 kl. 20:34]

Baldur, Þorsteinn og Guðmundur samála og árétta að við höfum ekkert að gera inn í ESB!

Nafni ég er samála að það mætti gera breytingu á stjórnkerfi landbúnaðarins.

[Þorsteinn H. Gunnarsson, 22.9.2010 kl. 20:39]

Það mætti ef til vill borga beingreiðslur til bænda beint úr ráðuneytinu.

Og svo þyrfti landbúnaðarráðuneytið að vera sjálfstæðara gagnvart Bændasamtökum Íslands.

[Árni Gunnarsson, 22.9.2010 kl. 21:06]

Samningar milli ríkis og bænda hefur verið  - og er í stöðugri endurkoðun. Helst gallinn á núverandi kerfi er sá að þrengja enn að rétti þeirra sem kjósa að framleiða beint á markað, en miklar líkur eru til þess að sú leið geti leyst styrkjakerfið af hólmi í aföngum.

Í það minnsta finnst mér fremur ástæða til að hliðra til í þessum efnum en að þrengja möguleikana.

Ég vil helst ekki sjá búvöruframleiðsluna færast frá bændunum til auðugra verksmiðjueiganda sem keypt hafa og sameinað landmiklar jarðir í grennd við þéttbýli.

[Jónas Jónasson, 22.9.2010 kl. 22:13]

188 sjómílur af okkar fiskveiðilögsögu rennur inn á borð ESB samhvæmt regluverki sambandsins malta fékk undanþágu og hélt 25.

Mér leist aldrei á ESB en þegar ég komst að þessu þá varð ég undrandi og hryggur yfir því að hér á landi skuli byggja fólk sem býður sig fram til að stjórna landinu á fölskum forsendum og reynir að blekkja bræður sína og systur til að selja ómetanlegar auðlindir landsins fyrir allt of lítið verð. Þetta er nákvæmlega eins og að selja kvóta frá Skipi og þá verður Skipið verðlaust.

[Sigurður M Grétarsson, 22.9.2010 kl. 23:03]

Baldur. Þessi texti, sem þú kallar "afstöðu ESB" sýnir akkúrat að það, sem ég er hér að segja og Össur er að segja í þessari grein, sem þú vísar í er rétt. Fullyrðingin um að Bændasamtökin séu þarna að beita blekkingum stendur því óhögguð.

Það kemur þarna fram eins og ég hef sagt að á meðan aðildaviðræðum stendur fer fram rýnivinna ásamt því að gerð er aðgerðarátætlun um það hvenær og hvernig skuli staðið að því að innleiða ESB reglur hér á landi milli þess tíma, sem aðild er samþyktk og þangað til af aðild verður. Það tímabil getur orðið allt að tvö ár. Einnig er gerð krafa um að stofnanir ríkisins séu styrktar þannig að tryggt sé að þær ráði við það verkefni innan þess tímaramma, sem gefin er. Sjálf aðlögunin fer síðan fram á þessu tímabili milli samþykktar á aðild og aðildar. Veriði aðild ekki samþykkt þá þarf þessi aðlögun aldrei að fara fram.

Þetta er þó ekki án undantekninga. Það má til dæmis sjá í 25. lið. Þar kemur meðal annars fram þessi texti: "Viðurkenning Íslands á réttindum og skuldbindingum sem leiðir af regluverkinu getur kallað á sérstaka aðlögun og að því leitt, í undantekningartilvikum, til aðlögunarráðstafana sem verður að skilgreina á meðan aðildarviðræðum stendur."

Þarna kemur skírt fram að það er aðeins kanski í undantekningartilvikum, sem þarf að framkvæma eitthvað af þeim þeirri aðlögun, sem þörf er á vegna aðildar á meðan á samningaviðræðum stendur. Það á fyrst og fremst við ef í ljós kemur að ekki er hægt að klára þá aðlögun á þeim tíma, sem til stendur að líði milli samþykktar á aðild og þess að aðild taki gildi. Einnig getur þar komið til að slíkt sé klárað eftir að af aðild verður en það þarf að gera í fáum skrefum, sem taka stuttan tíma eins og kemur líka fram í greininni. Það eru til fordæmi um þetta í aðildarsamningum annarra ríkja og þá bæði því að hefja breytingar áður en samningaviðræðum líkur og því að klára breytingar eftir að aðild hefur tekið gildi.

Þetta sýnir það að ekki er gerð krafa um aðlögun meðan á aðildaviðræðum stendur nema kanski í undantekningartilvikum. Fullyrðingar um að menn standi því frammi fyrir orðnum hlut þegar kemur að þjóðaratkvæðagreiðslu er því bull.

Guðmundur. Þó frjáls sala á landbúnaðarafurðum sé ekki hluti af EES samningnum þá eru samkeppnisreglur og reglur um það hvernig tengsl ríkisins eiga að vera við hagsmunasamtök hluti af EES samningnum. Landbúnaðarafurðir eru ekki bara í samkeppni við aðrar landbúnaðarafurðir heldur líka við fullt af öðrum vörum.

Jónas. ESB aðild felur ekki í sér neina sölu á auðlindum til ESB eða annarra ESB ríkja. Miðað við óbreyttar reglur ESB þá mun ESB aðeins ákveða heildarkvóta hér við land en við höldum veiðiréttinum og því munu íslensk stjórnvöld ráð hvernig þeim heildarkvóta er skipt milli útgerða. ESB aðild hefur aldrei leitt til þess að nein þjóð hafi misst auðlindir sínar og það er ekki né hefur nokkurn tíman verið stefna ESB að aðildarríki þurfi að láta auðlindir sínar af hendi. Fullyrðingar um auðlindaafsal eru því ekkert annað en mýtur og hræðsluáróður.

Þorsteinn. Við munum áfram hafa bændastétt þó við göngum í ESB. Fullyrðingar um alsherjarhrun landbúnaðar hér á landi við ESB aðild eru verulega ýktar svo vægt sé til orða tekið. Reyndar munu svína, kjúklinga og eggjabændur eiga erfiða daga innan ESB en ekkert bendir til þess að aðrar greinar landbúnaðar muni skaðast af inngöngu í ESB. Neytendur munu hins vegar fá að sjá lægra verð á landbúnaðarafurðum til heilla fyrir heimilin í landinu. Gleymum því ekki að það munu ekki bara verða felldir niður tollar á landbúnaðarafurðum fluttum frá ESB ríkjum til Íslands heldur líka frá Íslandi til ESB. Það mun opna fullt af tækifærum til útflutnings á landbúnaðarafurðum. Það sama á við um sjávarafurðir.

[Baldur (IP-tala skráð) 23.9.2010 kl. 00:39]

Sigurður, hefur þú lesið afstöðuskjal ESB? Ég hallast að því að þú sért jafn illa lesinn og utanríkisráðherrann. Hérna eru nokkrir punktar úr afstöðuskjalinu:

• Viðurkenning Íslands á réttindum og skuldbindingum sem leiðir af regluverkinu getur kallað á sérstaka aðlögun að því og leitt, í undantekningartilvikum, til aðlögunarráðstafana sem verður að skilgreina á meðan aðildarviðræðum stendur.
• Farið verður fram á það við Ísland að það tilgreini afstöðu sína með tilliti til regluverksins og geri grein fyrir því hve vel miði áfram við að uppfylla viðmiðanirnar. Rétt innleiðing Íslands á regluverkinu og framkvæmd þess, þ.m.t. árangursrík og skilvirk beiting af hálfu viðeigandi stofnana á sviði stjórnsýslu og dómsmála, mun ákvarða hversu hratt samningaviðræðurnar ganga fyrir sig.
• Í þessu skyni mun framkvæmdastjórnin fylgjast náið með framvindu Íslands á öllum sviðum og nota til þess öll tiltæk stjórntæki, þ.m.t. eftirlit sérfræðinga á vettvangi af hálfu framkvæmdastjórnarinnar eða fyrir hennar hönd. Framkvæmdastjórnin mun reglubundið upplýsa ráðið um framvindu Íslands á tilteknum sviðum meðan á samningaviðræðum stendur, einkum þegar lögð eru fram drög að sameiginlegri afstöðu ESB. Ráðið mun taka tillit til þessa mats þegar það ákveður frekari ráðstafanir sem tengjast samningaviðræðunum um þann kafla. Auk upplýsinganna, sem ESB getur farið fram á vegna samningaviðræðna um hvern kafla og gert er ráð fyrir að Ísland leggi fram fyrir ráðstefnuna, verður Ísland beðið um að halda áfram að leggja reglubundið fram ítarlegar, skriflegar upplýsingar um framvindu á aðlögun löggjafar að regluverkinu og framkvæmd hennar, jafnvel eftir að kafli hefur verið afgreiddur til bráðabirgða. Ef um er að ræða bráðabirgðaafgreiðslu á köflum getur framkvæmdastjórnin lagt til að aðildarviðræður verði teknar upp aftur, einkum ef Ísland hefur ekki uppfyllt mikilvægar viðmiðanir.

Þessi sjónarmið, ásamt fleirum voru lögð fram fyrir tæpum tveimur mánuðum í Brussel. Hver er að stunda ómerkilegan blekkingarleik?

[Gunnar Heiðarsson, 23.9.2010 kl. 10:36]

Sigurður, í síðasta kaflanum nr. 34, bls. 10 segir eftirfarandi; "verður Ísland beðið um að halda áfram að leggja reglubundið fram ítarlegar, skriflegar upplýsingar um framvindu á aðlögun löggjafar að regluverkinu og framkvæmd hennar".  Þetta segir allt sem segja þarf, því þurfa menn ekki að rífast um hvort við séum í aðlögunarferli eða ekki. Það eina sem þarf að rífast um er hvort við viljum ganga inn í ESB, kostirnir liggja fyrir, engar undantekningar en hugsanlega hægt að fá einhverjar frestanir. Þetta kemur skýrt fram í þessu plaggi auk þess sem fulltrúar ESB hafa allir marg ítrekað sagt þetta, jafnvel svo að þegar Össur heldur öðru fram á fréttamannafundum leiðrétta fulltúar ESB það á sömu fundum!

Því er spurningin aðeins ein; viljum við ganga inn í ESB eða ekki? Það er ekki um neina könnun að ræða!! 

[Ómar Bjarki Kristjánsson, 23.9.2010 kl. 13:51]

Það er reyndar ekki rétt að landbúnaður sé bara ,,fyrir utan" EES samninginn.  Það er misskilningur.

En varðand upphlaup bændasamtakanna núna - að hvað nákvæmlega eru þeir að tala um? þ.e. hvaða aðlögun eiga þeir von á o.s.frv.  Að ESB landbúnaarstyrkir fari að koma hingað eða?

[Valdimar Samúelsson, 23.9.2010 kl. 14:03]

Það skiptur engu með samninga en málið er að við viljum ekkert með ESB að gera og ekki einu sinni EES partinn af honum. Fólk með einhverju stolti er ekki að spyrja um hvaða hag við höfum að hinu og þessu hvað þá að ganga í bandalag við ESB klúbbinn.

Við viljum sjálfstæði okkar að fullu aftur þ.e. ekkert EES hankypanky.

[Ómar Bjarki Kristjánsson, 23.9.2010 kl. 17:58]

,,..samhvæmt regluverki sambandsins malta fékk undanþágu og hélt 25"

Fyrirgefðu, hvað var hún áður en þessi ósköp gerðust?  Og í framhaldi, hvað varð þá um 175 mílurnar eftir þessi ósköp?

[Svavar Bjarnason (IP-tala skráð) 23.9.2010 kl. 19:03]

Getur einhver frætt mig um hvort þær reglugerðir, sem við erum búin að taka upp vegna EES og hugsanlegrar aðildar að ESB, séu til góðs eða ills?

[Sigurður M Grétarsson, 25.9.2010 kl. 02:06]

Svavar. Flestar þær reglur, sem við höfum tekið upp vegna EES samningsins hafa verið til bóta. Til dæmis hafa flestar samkeppnisreglur komið til vegna EES aðildar og er tilurð Samkeppnisstofnunar vegna hennar.

Hvað varðar spurninguna um reglur, sem settar hafa verið vegna hugsanlegrar aðildar að ESB þá er því til að svara að engar slíkar reglur hafa veirð settar og stendur ekki til nema aðild verði samþykkt.

Staðreyndin er nefnilega sú öfugt við það, sem sumir eru að halda fram hér að við erum ekki í neinu aðlögunarferli að ESB. Við erum í umsóknarferli, sem endar með samningi, sem fer í þjóðaratkvæðagreiðslu til samþykktar eða synjunar. Það, sem krafa er gerð um meðan á samningaviðræðum stendurd er þarfagreining og dagsett aðgerðaráætlun. Það er ekki gerð krafa um að neinar reglur, sem nauðsynlegar eru til að við getum gegnið í ESB taki gildi áður en aðild hefur verið samþykkt nema í undantekningartilfellum ef einhverjar breytingar þurfa mjög langt ferli þannig að ekki sé hægt að klára það á þeim tíma, sem líður frá því aðild er samþykkt þangað til aðild tekur gildi.

Vissulega er hluti af aðgerðaráætluninni að semja lagabreytingar og breyttar reglur fyrir ýmsar stjórnsýslustofnanir en ekki er gerð krafa um að neina þeirra taki gildi fyrr en eftir að aðild hefur verið samþykkt og þá aðeins ef hún verður samþykkt. Þetta kom skýrt fram í fyrirlestri, sem yfirmaður samninganefndar Íslands, Stefán Haukur Jóhannesson hélt hjá Sterkara Íslandi fyrir nokkru. Það þekkir engin Íslendingur þetta ferli betur en hann. Aðrar þjóðir hafa gengið í ESB með sakvæmt sömu reglum og það var aðeins í undantekningartilfellum hjá þeim að þær breyttu reglum fyrir samþykkt á aðild.

Össur hefur því ekki verið að ljúga neinu. Það eru Bændasamtökin og ýmsir aðrir ESB andstæðingar, sem eru að halda því fram að við séum í einhverju aðlögunarferli, sem eru að ljúga.

Samkvæmt fréttum eru menn að undirbúa svar við fyrirspurn Bændasamtakanna í Utanríkisráðuneytinu. Vonandi verður hægt að koma þessari mýtu um aðlögunarferli út úr heiminum eftir það svar, svo við getum farið að ræða staðreyndir og takast á um kosti og galla þess að ganga í ESB.